Ég fluttist á barnsaldri til Akureyrar þar sem ég ólst upp við gott atlæti á Brekkunni. Eftir viðburðarík ár í Barnaskóla Akureyrar og Gagganum, eins og Gagnfræðaskólinn var kallaður, lá leið mín í Menntaskólann á Akureyri. Menntaskólaárin voru, líkt og hjá mörgum, einstaklega skemmtilegur tími og minningarnar ylja enn þann dag í dag. Það var líka þar sem draumurinn um ritstörf byrjaði fyrst að láta á sér kræla þó fljótlega hafi ég ýtt honum örlítið aftar í hugann þegar önnur verkefni fóru að taka meira pláss.

Lífið færði mig svo inn á brautir viðskipta- og markaðsmála sem ég lærði fyrst í Háskólanum á Akureyri og svo í Bournemouth í Bretlandi. Ég starfaði svo í rúm 20 ár við hin ýmsu störf í markaðs- og auglýsingageiranum auk þess sem ég kenndi markaðsfræði við HR, HA og HÍ í 10 ár. Árið 2011 stofnaði ég svo eigin auglýsingastofu sem ég rak í 8 ár þar til ég ákvað að söðla um og gefa ritstörfunum það pláss í lífi mínu sem mig hafði lengi dreymt um. Draumurinn hafði nefnilega aldrei dáið og árið 2010 skrifaði ég mína fyrstu bók í formið viðtals við Bubba Morthens. Fyrsta skáldlega verkefnið mitt var svo barnabókin Friðbergur forseti sem kom út fyrir jólin 2019 og sjálfstætt framhald hennar, Háspenna, lífshætta á Spáni, kom út ári síðar. Snemma árs 2022 birti ég smásöguna Heim í Tímariti Máls og menningar og mín fyrsta skáldsaga, Vængjalaus, kom út haustið 2022.

Nýverið kláraði ég MA nám í ritlist við Háskóla Íslands. Auk ritstarfa tek ég að mér ráðgjafa-, texta-, leikstjórnar- og framleiðsluverkefni. Að auki hef ég skrifað og flutt útvarpsþætti á Rás 1.

Hér má finna umfjöllun um mig og verkin mín:

• Segðu mér, viðtal – Rás 1 31. ágúst 2022
• Hún var með svip sem boraði gat á sál mína – mbl.is 16. ágúst 2022
• Alls engin miðaldrakrísa – Fréttablaðið 13. ágúst 2022
• Seldi auglýsingastofuna og fór að skrifa bækur – mbl.is 13. ágúst 2022
• Hættulegt að festast í fortíðinni – Rás 2 10. ágúst 2022
• Giftu sig í miðri jólatörn með 3 vikna fyrirvara – Fréttablaðið 24. nóvember 2020
• Sólarlandastemning í æð í nýrri barnabók – Fréttablaðið 28. október 2020
• Árni segir sögu systkina og skuggalegra náunga á Spáni: „Árið búið að vera skrýtið og krefjandi“ – Mannlíf 24. október 2020
• Krakkakiljan – Bókaormaspjall – Friðbergur forseti – Rúv 5. maí 2020
• Krakkafréttir vikunnar – Krakkafréttir og Friðbergur forseti – Rúv 26. apríl 2020
• Hlustað á hjartað og bar­ist gegn rang­læti – mbl.is 18. desember 2019
• Þjóðernispopúlistinn Friðbergur forseti – Lestrarklefinn 15. desember 2019
• Gott þegar hægt er að fá krakka til að hugsa um dýpri hluti – Mannlíf 2. nóvember 2019
• Bókin varð til í heita pottinum – Fréttablaðið 29. október 2019